لليزور حسين بالجنة نصيب.. واحنه ذيچ اسمائنه بدفتر حبيب
سجلاها بدفتره المابي دغش.. والثواب يطب گبل طبة النعش
شلون يتعذب اليهواله اثنعش.. وهمه خيرة خلق سبحانه المجيب
العجائب سبعة، ثامنها الحسين.. ساعة قاتل، ضلت الاف السنين
سيف بوجوه الظلم والظالمين.. الدنيا كلها تغيب وانته الما تغيب
اهواي لامونه عليمن هالدموع؟.. الدنية ليل ومو غلط نهوه الشموع
شي طبيعي اليفگد الغالي يلوع.. وغير دمعه شعنده لليفگد حبيب
اليزوره وعارف بحقه ينول.. جنة الله يطبها من باب الرسول
وحيدر على الباب والزهرة البتول.. شمس تطلع تجلي كل ليل النحيب
للعقل والعاقل اسأل هالسؤال.. الله اكرم منه ماكو، لا محال
حسين اكرم لله كل ماله وعيال.. وانت قيس هناك شيكرمه المجيب
والله دنيه واخره ينول الثواب.. اليحيي امره وفاض دمعه اعله المصاب
حسين باب الله الفلا ينسدله باب.. الدنيا كلها تغيب وانته الما تغيب.